Ürəyin sol mədəcik çatışmazlığı – adekvat qan dövranını təmin edən ürək əzələsinin (miokard) yığılma qabiliyyətinin zəifləməsi, orqanizmin funksional təchizatının təmin edilə bilinməməsi və ölüm riskinin artması ilə nəticələnən kompleks bir sindromdur. Yaşlı əhalinin xəstəxanaya yatışlarının başlıca səbəbi ürək çatışmazlığıdır. Ürək çatışmazlığının yaranma səbəblərinin üçdə ikisi ürəyin işemik xəstəliyidir (ÜİX). Sübut olunmuşdur ki, qeyri-funksional amma canlı olan miokardın qan təchizatı təmin edilərsə, həmin miokard toxumasının yığılma qabiliyyəti də bərpa olur.
ÜİX və ciddi sol mədəcik çatışmazlığı (sol mədəcik atım fraksiyası – EF <35%) olan xəstələrin müalicəsində dərman terapiyası, tac damarların stentlənməsi və şuntlama əməliyyatı əsas müalicə metodlarıdır. Araşdırmalar göstərir ki, kifayət qədər canlı ürək toxuması olan xəstələrdə müdaxilə (stentləmə və şuntlama) sonrası nəticələr daha yaxşı olur və ağırlaşmalar daha az rast gəlinir. Bu səbəbdən ürək əzələsinin canlılığını PET/CT examination ilə dəyərləndirməklə xəstəyə ən uyğun və uğurlu müalicə qərarı verilir.
